囍事

新詩

囍事

山路蹺螺螺　暗頭仔真鬧熱

番薯仔鳥　四界踅

盤山過嶺咧放送

「油桐姑娘欲出嫁

恁看伊的新娘紗」

春風微微踅　草埔若落雪

紅刺波　滿山地

鑼鼓叱吒真鬧熱

藤仔花　徛歸排

跳踢搖擺歕鼓吹

新郎身騎紅跤仔

一頂花轎綴後尾

炮仔蕉　攢好勢

小等毋通掣一下

田嬰是花童　蝶仔做伴嫁

露水頂真點胭脂

微風溫馴將頭梳

新娘媠面才媠命

衆人看頭閣看尾

新娘真緊張　面紅頭犁犁

聽着炮仔聲　煞來驚出嫁

莊頭佮莊尾　逐家覕相揣